Конференцијата на ОН за климата во Бразил ќе биде продолжена до викендот бидејќи претставниците на околу 200 земји вчера не постигнаа консензус за спорните прашања.
Најжестоката дебата беше околу тоа дали да се поддржи планот за напуштање на јагленот, нафтата и гасот.
Повеќе од 80 земји се за „патен план“ што би довел до прекин на употребата на фосилни горива, но ова наиде на голем отпор, особено од земјите производители на нафта.
Конференцијата, која требаше да заврши вчера, продолжува во текот на викендот, што не е невообичаено за годишните глобални разговори за климата.
Отстапувањето од фосилните горива беше едно од најспорните прашања на двонеделната конференција во бразилскиот амазонски град Белем.
Со денови, нациите се расправаат за иднината на фосилните горива, чие согорување испушта стакленички гасови кои се убедливо најголемата причина за глобалното затоплување.