Околу 750.000 федерални работници на Соединетите Американски Држави би можеле да бидат испратени на принуден одмор, додека клучните служби би продолжиле со својата работа, но без плата, бидејќи федералната влада не усвои закон за буџет – ова се некои од последиците од неуспешното гласање во Сенатот на САД за предлогот за привремен буџет.
Републиканците предложија краткорочно финансирање за владата на постојните нивоа до 21 ноември, но демократите го блокираа предлогот, барајќи тој да ги задоволи нивните барања за здравствена заштита, објави АП.
Демократските иницијативи вклучуваат повлекување на намалувањата на Медикејд и продолжување на даночните кредити за премиите за здравствено осигурување.
Канцеларијата за буџет на Конгресот проценува дека околу 750.000 федерални вработени би можеле да бидат испратени на принуден одмор секој ден од затворањето, а нивните дневни плати изнесуваат околу 400 милиони долари.
Работниците кои остануваат на работа, вклучувајќи ги истражителите на ФБИ, ЦИА, контролорите на летање и припадниците на војската, продолжуваат да работат без плата.
Ретроактивната исплата на плати е обезбедена со законите од 2019 година.
Многу задолжителни програми за трошење, како што се плаќањата за социјално осигурување и здравствена заштита на ветераните, продолжуваат да работат нормално.
Поштенската служба на САД, исто така, работи бидејќи се финансира од продажбата на своите услуги.
Агенциите имаат одредена слобода да изберат кои активности да ги суспендираат.
Министерството за здравство и социјални услуги ќе отпушти околу 41 процент од своите речиси 80.000 вработени, додека Центрите за контрола и превенција на болести ќе продолжат да ги следат епидемиите.
Националните институти за здравство ќе ги ограничат истражувачките активности и прифаќањето нови пациенти за студијата.
Администрацијата за храна и лекови ќе го одложи прегледот на апликациите за нови лекови и медицински помагала.
Националните паркови и музеи, вклучувајќи го и Институтот Смитсонијан, планираат ограничено или привремено затворање, додека некои објекти ќе останат отворени.
Аналитичарите предупредуваат дека продолжената суспензија би можела да има негативно влијание врз економијата, намалувајќи го растот за 0,15 до 0,2 процентни поени неделно.
Директорот на Канцеларијата за буџет на Конгресот, Филип Свегел, рече дека краткорочното прекинување на работата нема големо влијание врз економијата, особено затоа што федералните работници се платени ретроактивно според закон.
Но, според него, „доколку суспензијата продолжи, тоа може да доведе до неизвесност кога станува збор за улогата на владата во американското општество и финансиското влијание врз сите програми финансирани од владата“.
„Влијанието не е моментално, но со текот на времето, суспензијата ќе има негативно влијание врз економијата“, додаде тој, пренесува Танјуг.