Властите на ексклузивното американско одморалиште на богатите на островот Нантакет, во Нова Англија, открија дека локалниот канализациски систем е полн со кокаин, објавија денес американските медиуми.
Властите го открија ова откако започнаа со тестирање за следење на потенцијалната употреба на дрога во ова популарно летно одморалиште за богатите, објави Фокс њуз.
„Нантакет сега одлучи да започне со тестирање на канализацијата на почетокот на летото за да се утврди присуството на дрога, никотин и други супстанции“, изјави правниот аналитичар од Мериленд, Рандолф Рајс.
Откриено е екстремно високо ниво на кокаин, околу 50 проценти повисоко од националниот просек, објавија локалните власти. Тестовите, исто така, открија пониско од просечното ниво на фентанил.
Анализата бара различни дроги, вклучувајќи кокаин, метамфетамин, фентанил и други опијати, како и ксилазин, животински анестетик за кој властите велат дека сè повеќе се наоѓа измешан со други наркотици.
Поранешниот специјален агент на американската агенција за борба против дрога ДЕА, Дејвид Кац, изјави дека контаминацијата на канализацијата во Нантакет може да укажува дека некој фрлил голема количина дрога во тоалетот за да не ја пронајде полицијата, или дека станува збор за помали, но чести фрлања кокаин во тоалетите.
Според правниот аналитичар Рајс, ова второ сценарио изгледа поверојатно бидејќи тестирањето е спроведено неколку пати во текот на летото, а не само по еден инцидент, пренесува Танјуг.