Сушата продолжи да биде исклучително силна на почетокот на август во Европа и Медитеранот, при што повеќе од половина (51,3 проценти) од земјиштето е погодено, според денешната анализа на најновите податоци од Европската опсерваторија за суша, пренесува АФП.
Толку висока стапка никогаш не е забележана во периодот од 1 до 10 август, откако започнаа набљудувањата во 2012 година.
До средината на април, околу половина од оваа област е погодена од суша, која по сериозност ја надминува силната суша од летото 2022 година.
Индикаторот за суша „Коперник“ на Европската опсерваторија, составен од сателитски набљудувања, ги комбинира нивоата на врнежи од дожд, влажноста на почвата и условите на вегетацијата.
Поделен е на три нивоа на суша: мониторинг, предупредување и тревога.
На почетокот на август, 7,8 проценти од Европа и Медитеранот беа во состојба на тревога (најсериозно ниво), 38,7 проценти во состојба на предупредување и 4,9 проценти во состојба на надзор.
Кавказ и Северен Балкан се регионите најпогодени од суша.
Грузија и Ерменија беа погодени од суша над 97 проценти од нивната територија, како и Бугарија и Косово, додека Србија, Македонија, Албанија, Унгарија и Црна Гора имаа најмалку три четвртини од нивната површина под предупредување или тревога.
Тој дел од Европа беше погоден од топлотни бранови во јули и август, кои поттикнаа бројни шумски пожари, од кои некои беа фатални (еден смртен случај во Црна Гора, еден во Албанија).
Шпанија, Португалија и Италија, кои исто така беа погодени од сериозни пожари претходно овој месец, сега се само локално погодени од суша.