Австралија го повика Израел да не презема воена контрола врз Газа, велејќи дека таков потег дополнително ќе ја влоши хуманитарната криза во енклавата.
„Австралија го повикува Израел да не го следи овој пат, што само ќе ја влоши хуманитарната катастрофа во Газа“, изјави министерката за надворешни работи Пени Вонг, објави денес Ројтерс.
Вонг нагласи дека трајното присилно раселување е кршење на меѓународното право, повторувајќи ги повиците за прекин на огнот, непречен проток на хуманитарна помош и ослободување на заложниците што ги држи Хамас од октомври 2023 година.
Според неа, решението засновано на моделот на две држави – Палестина и Израел, кои живеат една до друга во мир и безбедност во рамките на меѓународно признатите граници, „е единствениот пат до траен мир“.
Австралија сè уште не одлучила дали ќе ја признае палестинската државност, за разлика од Обединетото Кралство, Канада и Франција, но рече дека ќе донесе одлука „во соодветно време“.
Соопштението дојде откако израелскиот премиер Бенјамин Нетанјаху во интервју за „Фокс њуз“ објави дека Израел има намера да преземе воена контрола врз цела Газа, со идеја подоцна да ја предаде територијата на арапските сили, без да прецизира кои земји би биле вклучени.
По вчерашниот состанок на безбедносниот кабинет, кабинетот на Нетанјаху потврди дека е одобрен планот за заземање на градот Газа, заедно со обезбедувањето хуманитарна помош за цивилите надвор од борбените зони, пренесува „Танјуг“.