Палестинската група Хамас синоќа објави дека е подготвена за индиректни преговори со Израел за договор за прекин на огнот и ослободување на заложниците.
Хамас објави дека е „подготвен веднаш да започне рунда индиректни преговори за постигнување договор за спорните точки“, објави „Тајмс оф Израел“.
Во соопштението, Хамас наведе дека целта на разговорите е да се постигне договор што „обезбедува помош“ за народот во Газа „и ја завршува хуманитарната катастрофа, што на крајот би довело до траен прекин на огнот и целосно повлекување на окупаторските сили“.
Хамас не соопшти дали го повлекол ажурираниот предлог што го доставил во саботата до специјалниот пратеник на САД за Блискиот Исток, Стив Виткоф, кој го нарече „тотално неприфатлив“.
Израел го прифати планот на Виткоф, додека Хамас претходно изјави дека не ги исполнува основните барања, вклучително и крајот на војната.