Рускиот претседател Владимир Путин изјави денес дека 80-годишнината од победата над фашизмот обединува милиони луѓе ширум светот и ја нагласи важноста од зачувување на сеќавањето на „херојската борба против нацизмот“.
Тој, исто така, предупреди дека денес Русија се соочува со обиди за препишување на историјата и фалсификување на резултатите од Втората светска војна.
Во своето обраќање до учесниците на III меѓународен антифашистички конгрес, Путин нагласи дека овој празник е драг на сите оние кои го чуваат споменот на подвизите на генерацијата победници, кои „го смачкаа нацизмот и ги спасија Европејците од ропство“, објави РИА Новости.
Путин додаде дека Русија денес се соочува со сериозни предизвици, вклучително и фалсификување на резултатите од Втората светска војна, кои често се ревидираат за да одговараат на политичките интереси на одредени земји.
„Кога резултатите од најбруталната војна на 20 век се ревидираат и фалсификуваат, а улогата на Советскиот Сојуз во постигнувањето на победата се омаловажува, многу е важно да бидеме обединети во одбраната на вистината за таа војна“, рече рускиот претседател.
Тој, исто така, нагласи дека е потребно да се спротивставиме на ширењето на деструктивни идеологии, како што се расизмот, неонацизмот, русофобијата и антисемитизмот, јави ТАСС.
Според него, тоа е должност кон ветераните и идните генерации, бидејќи само преку единство и зачувување на вистината за изминатата војна Русија може да изгради безбеден и праведен свет, заснован на рамноправни, партнерски односи меѓу народите.
Оваа годишнина, како што истакна Путин, ја симболизира универзалната борба за правда и слобода и како таква ги обединува луѓето од сите народи во сеќавање на херојскиот отпор против нацистичката окупација.
Се очекува лидери од неколку земји да присуствуваат на 80-годишнината од победата во Втората светска војна, која ќе се прослави на 9 мај во Москва.