Во седиштето на воената алијанса во Брисел денеска почнува дводневниот состанок на министрите за надворешни работи на членките на НАТО, чиј фокус требаше да биде зголемување на распределбата на сојузниците за одбрана и продолжување на поддршката за Украина.
Шефовите на дипломатиите на 32-те членки на НАТО ќе разговараат и за продолжување на подготовките за самитот на лидерите на алијансата што ќе се одржи во Хаг на крајот на јуни.
Се очекува министрите да разговараат за тоа како да се одржи моментумот во зголемувањето на трошоците за одбрана и начините за обновување на индустриското производство во одбранбениот сектор.
Министрите, исто така, требаше да разменат мислења за континуираната поддршка на НАТО за Украина и за начините за понатамошно развивање на соработката на алијансата со партнерите од индо-пацифичкиот регион, вклучувајќи ги Австралија, Јапонија, Нов Зеланд и Јужна Кореја.
За време на дводневниот состанок во Брисел ќе се одржат три состаноци на Северноатлантскиот совет, клучното тело на НАТО задолжено за одлучување.
Ќе се одржи и состанок на Советот НАТО-Украина на кој заедно со шефовите на дипломатиите на членките на НАТО ќе учествуваат и министерот за надворешни работи на Украина Андриј Сибига и високата претставничка за надворешна и безбедносна политика на ЕУ Каја Калас.
Министрите за надворешни работи на членките на НАТО одвоено ќе разговараат и со Каја Калас и претставници на индо-пацифичките партнери на алијансата.