Турската полиција уапси 282 лица осомничени за поврзаност со милитантната Курдистанска работничка партија (ПКК), соопшти денеска турскиот министер за внатрешни работи Али Јерликаја.
Како што јави Ројтерс, меѓу уапсените има новинари, политичари и академици.
Во последните пет дена турските власти продолжија да ги отстрануваат прокурдските градоначалници од функциите во полициските акции поради нивните врски со милитантите.
Засилените акции дојдоа во време кога постоеше надеж дека 40-годишниот конфликт меѓу ПКК и турските власти може да заврши, наведува британската агенција.
Затворениот водач на ПКК Абдула Оџалан се очекува да издаде изјава за таквите напори, четири месеци откако помошникот на претседателот Реџеп Тајип Ердоган го повика да влијае врз милитантите да го остават оружјето.
Здружението на турските новинари го осуди апсењето на тројца новинари во последната полициска акција.
Меѓу уапсените има членови на партијата Народен демократски конгрес (ХДК), како и помали левичарски партии, академици и истакнати активисти за правата на ЛГБТ.
Полицијата спроведе операции во 51 провинција, вклучително и главниот град Анкара и Истанбул.
Јерликаја рече дека осомничените се обвинети за ширење пропаганда на ПКК, финансирање на групата и регрутирање нејзини членови, како и учество во улични протести.
Тој додаде дека полицијата запленила и две пушки АК-47 и друго оружје за време на претресите.
„Ние сме решени да ги искорениме сите форми на тероризам за да ја постигнеме нашата цел – Турција без тероризам и да обезбедиме мир, единство и солидарност за нашата нација“, рече Јерликаја.
Во својот последен потег, Турција смени прокурдски градоначалник од партијата ДЕМ во источната провинција Ван под обвинение за тероризам, со што вкупниот број на градоначалници отстранети од партијата од изборите во 2024 година се искачи на осум.
ПКК, која Турција и нејзините западни сојузници ја означуваат како терористичка организација, води бунт против државните власти од 1984 година, а повеќе од 40.000 луѓе се убиени во тие конфликти, потсети Ројтерс.