Градоначалникот на популарниот италијански ски-центар Рокарасо, Франческо ди Донато, го ограничи бројот на автобуси кои се дозволени во градот на 100 за време на викендите, поради загриженоста за прекумерен туризам, објави денеска Гардијан.
Минатиот викенд, 260 автобуси со над 10.000 туристи од јужните италијански региони пристигнаа во Рокарасо, откако популарната инфлуенсерка на ТикТок од Неапол, Рита де Крешенцо, објави слики и видеа од ски-центарот во Абруцо.
Ди Донато рекол дека одморалиштето и претходно било фреквентно, но дека никогаш немало прилив на туристи како минатиот викенд, пренесува Танјуг.
Тој навести дека можеби ќе повика војска за да го реши проблемот, но засега го ограничи бројот на туристички автобуси што можат да влезат во градот во сабота и недела на 100, а автобуските компании ќе мора однапред да резервираат места преку интернет.
Просечно 20.000 скијачи се упатуваат кон Рокарасо за време на викендите во јануари и февруари, со дополнителни 15.000 туристи кои штотуку го посетуваат.
„Имаме стотици неовластени автобуси кои пристигнуваат. Во неделата пристигнаа 260, особено од Кампанија, кои донесоа уште 10.000-12.000 луѓе. Ова беше вистински напад и ситуацијата стана неуправлива“, изјави Ди Донато.
Тој ги отфрли обвинувањата од корисниците на социјалните мрежи за дискриминација на Наполитанците, тврдејќи дека градот треба да се заштити и дека премногу луѓе претставуваат безбедносен ризик.
Де Крешенцо не ја прифати одговорноста за напливот на туристи и изјави дека не е „одговорна за однесувањето на другите“, туку само посочи дека Рокарасо е прекрасно место.