Околу 90 палестински затвореници се ослободени во замена за тројца израелски заложници кои Хамас му ги предаде на Израел како дел од примирјето со цел да се стави крај на 15-месечната војна во Газа.
Затворениците, од кои повеќето беа ослободени во раните утрински часови од затворот Офер во Рамала на окупираниот Западен Брег, беа пречекани со прослави од илјадници луѓе кои вееја палестински знамиња и знамиња на Хамас.
Семејствата и пријателите чекаа со часови на студ за да ги прегрнат своите најблиски, пуштени како што беше договорено.
„Многу лошо се однесуваа со мене во затвор, беше страшно“
Меѓу ослободените беше и Шата Џараба (24), кој беше уапсен поради објава на социјалните мрежи во која ја критикуваше „бруталноста“ на кампањата на Израел во Газа.
„Многу сум среќна! Фала му на Бога, излезена сум. Во затворот ме третираа многу лошо. Беше страшно”, изјави таа за Гардијан.
„Среќна сум, но не целосно среќна. Ќерка ми беше уапсена само затоа што ги искажа своите ставови… Најмногу ме боли што луѓето мислат дека Израелците вака се однесуваат со нас само од 7 октомври, но вистината е дека отсекогаш било вака“, рече таткото на Џараба, Наваф Џараба (63).
Меѓу ослободените е и Ахмад Кша (18), уапсен во јануари 2024 година во Џенин, откако неговиот брат беше убиен во престрелка.
„Ме уапсија затоа што брат ми беше убиен. Во саботата, пред да не ослободат, фрлаа солзавец во нашите ќелии и не малтретираа секој ден“, рече тој.
Палестинците го слават Хамас
Осама Шадех, татко на 17-годишната Асеел, исто така беше меѓу оние што чекаа ослободување на нивните најблиски.
Неговата ќерка беше уапсена додека протестираше против убиствата на палестинските деца во Газа.
„Ослободувањето на мојата ќерка значи дека Израел знае дека не направила ништо лошо, но сепак ја држеа во затвор повеќе од една година“.
На улиците на Рамала, стотици луѓе извикуваа „Народот ги сака бригадите Ал-Касам“, славејќи ја улогата на Хамас во прекинот на огнот и размената на затвореници.
Во неделата, три жени заложници од тунелот во Газа – Емили Дамари (28), Роми Гонен (24) и Дорон Штајнбрехер (31) – беа ослободени и вратени кај нивните семејства.
Скеновите покажуваат дека се во добра здравствена состојба, но ќе поминат неколку дена во болница.
Првата фаза од прекинот на огнот вклучува ослободување на 33 заложници од Газа и стотици Палестинци од израелските затвори.
Следните фази планираат ослободување на преостанатите заложници, целосно повлекување на Израел од Газа и реконструкција на територијата.
Условите за управување во Газа остануваат нејасни.