Најмалку 34 лица загинаа во циклонот Чидо во Мозамбик, соопшти Канцеларијата на Обединетите нации за координација на хуманитарни прашања (OCHA), цитирајќи податоци од националната агенција за вонредни состојби.
„До 17 декември 2024 година, се проценува дека 174.158 луѓе биле погодени од циклонот, 34 луѓе загинале, а 319 се повредени“, се вели во соопштението на OCHA, цитирано од Институтот за природни катастрофи во Мозамбик, пренесе Ројтерс.
Малиот француски остров Мајот го презеде најголемиот дел од циклонот, при што се верува дека илјадници луѓе загинале пред циклонот да продолжи кон Мозамбик, на источниот брег на јужна Африка.
Како што беше претходно наведено, властите на островот итно испорачуваат помош по циклонот поради страв од голем број жртви.
Поради циклонот, големи делови од источниот брег на Африка сè уште се недостапни, а властите проценуваат дека ќе поминат неколку дена пред да се утврдат штетите и бројот на жртвите.
Францускиот претседател Емануел Макрон по вонредниот состанок на владата најави дека во наредните денови ќе го посети Мајот.
Мајот е главна дестинација за илегалните имигранти од соседните Коморски острови, кои беа погодени од немири во последните години.
Повеќе од три четвртини од околу 321.000 жители на Мајот живеат во релативна сиромаштија.
Циклонот Чидо е оценет како најсилен во последните 90 години, соопшти француската метеоролошка служба Метео Франс.