Универзитетот Јеил следната година ќе воведе нов курс кој ќе ја проучува работата на поп-ѕвездата Бијонсе, која има рекордни 99 номинации за Греми и е препознаена како еден од највлијателните уметници во музичката историја.
Насловен „Бијонсе прави историја: радикална афро-американска традиција, култура, теорија и политика преку музика“, курсот ќе се фокусира на периодот од нејзиниот истоимениот албум од 2013 година до овогодинешниот „Каубој Картер“ и како светски познатата пејачка и текстописец создаде свест и ангажман во социјалните и политичките идеологии, објави ABC News.
Професорката по афроамерикански студии на Универзитетот Јеил, Дафне Брукс, планира да го искористи обемниот репертоар на пејачката, вклучувајќи снимки од нејзините настапи во живо, како „портал“ за студентите да учат за афроамериканските интелектуалци, од Фредерик Даглас до Тони Морисон.
„Ќе ги сфатиме сериозно начините на кои критичката и интелектуалната работа на некои од нашите најголеми мислители во американската култура се поврзува со музиката на Бијонсе и ќе размислиме за начините на кои можеме да ги примениме нивните филозофии на нејзината работа“, рече Брукс.
Бијонсе, чие целосно име е Бијонсе Жизел Ноулс-Картер, не е првиот уметник чии песни најдоа место во наставната програма на универзитетот.
Тие веќе ги проучуваат делата на кантавторот Боб Дилан, а неколку универзитети воведоа часови за пејачката Тејлор Свифт и нејзините текстови.