Израелски официјални лица му рекле на Барак Равид, добро информиран и поврзан известувач на Аксиос, дека Израел ќе започне „значителна одмазда“ на масовниот ракетен напад на Иран во рок од неколку дена, а целите може да вклучуваат нафтени постројки и други стратешки локации.
Израел и Иран никогаш не биле поблиску до отворање нов и многу поопасен фронт во војната што го зафати Блискиот Исток.
Да потсетиме дека синоќа Иран се закани дека повторно ќе го нападне Израел доколку еврејската држава одговори со сила на речиси 200-те проектили што ги лансираше вчера.
Доколку тоа се случи, израелските власти велат дека сите опции ќе бидат на маса, вклучително и нападите врз иранските нуклеарни постројки.
„Големото прашање е како Иранците ќе одговорат на нападот, но ја земаме предвид можноста дека се подготвени на се, што значи дека ќе следи многу поинаква игра“, рече израелскиот претставник.
Многу израелски официјални лица ги посочуваат иранските нафтени постројки како веројатна цел, но некои велат дека се можни целни убиства и уништување на иранските системи за противвоздушна одбрана.
Одговорот на Израел може да вклучи воздушни напади од борбени авиони, како и тајни операции слични на оние во кои беше убиен лидерот на Хамас Исмаил Ханије во Техеран пред два месеци.
Последниот одговор на иранскиот напад во април беше релативно воздржан
Да потсетиме, Израел во април одговори на иранскиот напад со проектили и беспилотни летала со многу ограничен напад на батеријата за противвоздушна одбрана С-300 во Иран, со што ја прекина размената на директни удари.
Овој пат израелската одмазда ќе биде многу позначајна, изјавија израелските власти.
Состанок на израелскиот воен кабинет во подземен бункер
Воениот кабинет на Израел се состана вчера во подземен владин бункер во планина во близина на Ерусалим. Состанокот започна кога првиот бран ирански балистички ракети се упати кон Израел.
Многу од иранските ракети беа пресретнати од израелски и американски системи за противракетна одбрана.
Оние кои не беа пресретнати главно погодија отворени области во близина на базата на воздухопловните сили во јужен Израел, штабот на Мосад и воената разузнавачка база северно од Тел Авив.
Еден израелски воен претставник изјави за Аксиос дека десетици ирански проектили биле истрелани кон седиштето на Мосад, но ниту една не погодила внатре во комплексот.
„Иран направи голема грешка вечерва и тие ќе платат за тоа“, рече Нетанјаху во видеото објавено од неговиот кабинет.
„Режимот во Иран не ја разбира нашата решеност да се браниме и нашата решеност да се одмаздиме на нашите непријатели. Тие ќе разберат. Ќе се држиме до правилата што ги воспоставивме: кој и да не нападне, ќе го нападнеме“, продолжи Нетанјаху.
Двајца израелски официјални лица изјавија дека состанокот на владата заврши по неколку часа со договор дека ќе има израелски воен одговор, но нема јасна одлука за тоа каков ќе биде тој одговор.
Прво има консултации со Америка
Висок израелски функционер изјави за Аксиос дека една од причините поради која одлуката не е донесена на состанокот на владата е тоа што израелските власти сакаат да се консултираат со администрацијата на Бајден.
Иако Израел ќе одговори сам, тој сака да ги координира своите планови со САД поради стратешките импликации на ситуацијата.
Уште еден ирански напад како одговор на израелската одмазда ќе бара одбранбена соработка со Централната команда на САД, повеќе муниција за израелските воздухопловни сили и потенцијално други видови американска оперативна поддршка, рече израелскиот претставник.
Што велат во Вашингтон?
Американскиот претседател Џо Бајден изјави вчера дека САД и Израел разговараат за одговор на иранскиот напад и „останува да се види“ каков ќе биде исходот.
Американски функционер во вчерашните разговори меѓу администрацијата на Бајден и израелската влада изјави дека САД јасно ставиле до знаење дека го поддржуваат израелскиот одговор, но дека сметаат дека треба да се измери.
Бајден рече дека ќе разговара со Нетанјаху за одговорот на израелскиот напад. Израелски официјален претставник изјави дека повикот може да се случи денеска неколку часа пред еврејскиот празник Рош Хашана.