Предлогот поднесен од крајно левичарската партија Неосвоена Франција (LFI) за импичмент на францускиот претседател Емануел Макрон влезе во собраниска процедура, објави La Parisienne.
Предлогот претпладнево помина на првиот круг од собраниската проверка, а „за“ гласаа 12 членови од 22-члената комисија.
Сојузниците на ЛФИ, вклучително и пратеници од Социјалистичката партија, рекоа дека нема да гласаат за импичмент на францускиот претседател.
Правилата за поднесување барање за импичмент на францускиот претседател се прецизирани во членот од Уставот.
Предлогот на Неосвоена Франција собра поддршка од повеќе од 80 пратеници.
Доколку помине, предлогот ќе биде ставен на гласање во наредните недели, за што ќе биде потребна поддршка од две третини од пратениците.
Ако тоа се случи, тогаш нацрт-законот се префрла во Сенатот, каде што две третини од членовите таму исто така мора да гласаат за.
Ниту еден актуелен француски претседател не е отповикан за време на Петтата република, иако предлогот за импичмент на Франсоа Оланд, предложен од пратениците од десницата во 2016 година, стигна до собранието.
Неосвоената Франција, во текстот објавен во францускиот неделник „Трибјун Диманш“, објаснувајќи го предлогот за импичмент, го обвини Макрон за „институционален удар против демократијата“, бидејќи одбил да ги прифати резултатите од парламентарните избори одржани во јули.
Во текстот од партијата посочуваат дека Макрон „мора да знае дека ќе се употребат сите уставни средства за негово отстранување од функцијата“.
Неосвоената Франција наведува дека одбивањето да се почитуваат изборните резултати и одлуките за нивно игнорирање претставуваат кршење на основните услови од претседателскиот мандат, бидејќи тие бараат шефот на државата да биде гарант за почитување на демократијата и организациските правила во Франција, јавува Танјуг.
На 23 јули, Макрон ја отфрли можноста за именување на кандидатката на коалицијата Новиот народен фронт Луси Каст за премиер, велејќи дека таа нема да може да добие доволно поддршка во парламентот. Во меѓувреме го назначи Мишел Барние за премиер.