Вчера Венецуелците чекаа во редици на избирачките места и гласаа на најважните избори во четвртвековното владеење на социјалистичката партија, а претседателот Николас Мадуро е уверен во победата иако опозицијата доби страсна поддршка и предупреди на можни нерегуларности.
Опозициската лидерка Марија Корина Мачадо е ѕвездата на коалициската кампања, и покрај забраната за јавна функција што ја принуди да му го предаде факелот на Едмунд Гонзалес, 74-годишен поранешен дипломат.
Гонзалес доби поддршка дури и од некои поранешни поддржувачи на владејачката партија, но опозицијата и набљудувачите се сомневаат дека изборите ќе бидат фер, пренесува ХИНА.
Посочуваат дека одлуките на избирачките органи и апсењето на опозиционерите имаат за цел да создадат различни пречки.
Мадуро, чиј реизбор во 2018 година Вашингтон и некои други земји не го сметаат за легитимен, изјави дека Венецуела го има најтранспарентниот изборен систем во светот и предупреди дека ќе има крвопролевање доколку загуби.
Избирачките места се затвораат во 18 часот по локално време, а резултатите би можеле да бидат објавени во текот на ноќта во понеделник и во наредните денови.
Мадуро беше на власт кога Венецуела беше погодена од економски колапс, како и емиграција на околу една третина од населението.
Во исто време, дојде до нагло влошување на дипломатските односи со САД и ЕУ, со санкции кои дополнително ја оштетија и онака распаднатата економија на земјата, која е зависна од извозот на нафта.