Русија и Иран ја завршија подготовката на договорот за сеопфатно стратешко партнерство и тој наскоро ќе биде потпишан, изјави денеска заменик министерот за надворешни работи на Руската Федерација Андреј Руденко.
Тој изјави за Тас дека текстот на договорот е финализиран за време на многу продуктивни консултации на експерти од Министерството за надворешни работи на двете земји, кои се одржаа во Москва на 21 јуни.
„Договорено е да се започнат внатрешните државни процедури неопходни за подготовка за потпишување на договорот на еден од претстојните билатерални контакти на највисоко ниво“, рече Руденко.
Според него, работата на документот, кој беше дизајниран да ги подигне руско-иранските односи на ниво на сеопфатно стратешко партнерство, траеше речиси две и пол години.
Претходно иранската новинска агенција ИРНА јави дека новоизбраниот претседател на Иран, Масуд Пезешкијан, во телефонски разговор со рускиот претседател Владимир Путин изјавил дека Техеран е подготвен да потпише сеопфатен договор за стратешко партнерство со Москва во октомври на самитот БРИКС во Казан.