Францускиот претседател Емануел Макрон предупреди денеска за „нов империјализам“ во Пацификот за време на посетата на регионот.
Тој го осуди „предаторското однесување на големите сили“ во регионот, каде Кина ги проширува трговските и безбедносните врски.
Франција, која има островски територии што го опфаќаат Индо-Пацификот, вклучително и Француска Полинезија, ги зајакна одбранбените врски со Индија и другите земји во регионот како дел од потезите за спротивставување на влијанието на Кина, објави Ројтерс.
Во говорот во Вануату, Макрон, првиот француски претседател кој стапнал на островската држава на Тихиот Океан по Шарл де Гол, рече дека Франција ќе работи „рамо до рамо“ со земјите во регионот за да ја зачува нивната независност.
„Во Индо-Пацификот, особено во Океанија, постои империјализам и логика на моќ што го загрозува суверенитетот на многу земји, најмалите и честопати најкревките“, рече Макрон, без да именува ниту една земја.
Современиот свет го тресе суверенитетот и независноста на Индо-пацификот, рече тој.
По посетата на Вануату, Макрон вечерва треба да пристигне во Папуа Нова Гвинеја, која денеска ја посети американскиот министер за одбрана Лојд Остин.
Во мај, САД и Папуа Нова Гвинеја потпишаа договор за одбрана, кој ја поставува рамката за Вашингтон да ги обнови пристаништата и аеродромите во земјата за воена и цивилна употреба.
САД и нивните сојузници се обидуваат да ги одвратат островските нации во Тихиот Океан да воспостават безбедносни врски со Кина, соопшти агенцијата.
Советниците на Макрон велат дека Франција може да биде „алтернатива“ и да им помогне на островските нации да ги диверзифицираат своите партнерства за да не станат премногу зависни од една земја.