Раководството на холандскиот аеродром „Шипхол“ во Амстердам денеска соопшти дека ќе ги забрани ноќните летови и приватните авиони со цел да се намали загадувањето со гасови и бучава.
Авионите нема да полетуваат од полноќ до шест часот, а слетувања нема да се случат пред пет часот. Тоа значи дека ќе има 10.000 летови помалку годишно.
Тие промени во еден од најголемите европски воздухопловни центри треба да стапат на сила во сезоната 2025-2026. години.
„Единствениот начин е да се биде потивок, почист, побрз“, рече извршниот директор на аеродромот Руд Сондаг, додавајќи дека забраната за ноќни летови ќе донесе мир во населението во областа.
Приватните авиони ќе бидат забранети бидејќи предизвикуваат „непропорционална количина на загадување на бучавата и емисија на CO2 по патник“, 20 пати повеќе CO2 од големите комерцијални авиони.
Во ноември, холандската полиција приведе неколку стотини климатски активисти кои ја блокираа пистата на аеродромот, се возеа со велосипеди на неа и седеа пред хангарот со приватни авиони.
Во јуни 2022 година, холандските власти објавија дека ќе го намалат годишниот број на летови на аеродромот Шипхол од 500.000 пред епидемијата на корона вирусот на 440.000 до 2024 година, со цел да се ограничи загадувањето на бучавата и гасот.
Големите авиокомпании, вклучувајќи ги KLM, Delta и EasyJet, објавија во март дека ќе бараат правна заштита против одлуката на холандската влада.