Судот во Мјанмар денеска ја осуди соборената премиерка Аунг Сан Су Чи на три години затвор под обвинение дека примала мито, пренесе Ројтерс, цитирајќи лице запознаено со ова прашање.
Премиерката се соочува со најмалку 18 обвиненија, кои се движат од корупција до кршење на изборните закони, кои вкупно може да носат максимална казна од речиси 190 години, објави Ројтерс.
Су Чи ги нарече обвиненијата против неа апсурдни и негираше каква било злоупотреба.
Таа е во домашен притвор во главниот град Најпида, а судењата се затворени за јавноста.
Последното обвинение е поврзано со наводите дека Су Чи примала мито од бизнисмен, додаде изворот на Ројтерс.
Противниците на военото владеење велат дека обвиненијата против Су Чи имаат за цел да ја спречат повторно да се вклучи во политиката или да се обиде да ја предизвика воената хунта која е на власт од минатогодишниот пуч.