Во Изложбениот салон на НУ Центар за култура „Трајко Прокопиев“ – Куманово во четврток со почеток во 19 часот ќе биде отворена изложбата „Стеги“ од авторот Илија Струмениковски.
Се работи за 20 слики работени во техниката акрил на хартија и претставуваат дел од најновата продукција на Струмениковски којшто живее и работи во Куманово.
Илија Струмениковски е роден 1940 година и зад себе има реализирано извонредна актерска кариера како театарски, филмски и телевизиски актер. Се пензионира во 2005 година, а за својата работа има добиено повеќе награди и признанија. Покрај актерството тој педесетина години се занимава и со сликарство остварувајќи дваесеттина самостојни претставувања како и учество на повеќе групни изложби.
Од своето последно јавно презентирање, пред 9 години, па сè до денеска, авторот Илија Струмениковски остана верен на идејата дека уметноста може да го објасни светот, за што визуелно говори и во најновиот циклус “Стеги“. Развивајќи ја претходно поставената ликовна лексика, со пречистен цртеж и сложена
просторно-контекстуална композиција, составена од веќе познати архетипски елементи ставени во една симбиоза којашто извира од центарот на сликата, Струмениковски цврсто опстојува на изворно поставениот концепт: перманентната интеракција помеѓу животот и неговото опкружување проследено со незапирлива трансформација и модификација, како циклично поставена енергетска трансмисија на форми и бои во целиот раскош на комплексноста на постоењето.
Пишува: Роберт Цветковски, историчар на уметноста