Policia dje gjatë një aksioni të gjerë në Kumanovë shqiptoi 70 gjoba për drejtuesit e motoçikletave dhe trotinetëve elektrikë, ndërsa u konfiskuan disa motoçikleta dhe një katërçikël.
Sipas Ministrisë së Punëve të Brendshme, aksioni u zhvillua nga ora 14:00 deri në 20:00 me qëllim sanksionimin e drejtuesve të trotinetëve elektrikë dhe pjesëmarrësve të tjerë në komunikacion që nuk respektonin rregullat.
Gjithsej u shqiptuan 70 masa për kundërvajtje në komunikacion dhe vepra penale.
Prej tyre, nëntë masa ishin ndaj drejtuesve të trotinetëve elektrikë, dy për motoçikleta me regjistrim të skaduar, 39 për drejtues që nuk mbanin helmetë mbrojtëse, një për drejtim nën ndikimin e alkoolit, një për sigurim të skaduar, tre për kategori të papërshtatshme të patentës, tre për mungesë ose mosvazhdim të patentës së shoferit dhe tetë për mungesë të targave.
Gjatë aksionit u konfiskua edhe një motoçikletë me regjistrim të skaduar për më shumë se gjashtë muaj.
Policia zbuloi edhe katër vepra penale. Tri prej tyre kishin të bënin me të mitur që drejtonin motoçikleta, ndërsa një person u arrestua për veprën penale të drejtimit të pakujdesshëm të automjetit. Në këtë rast u konfiskuan tre motoçikleta dhe një katërçikël.
Për të gjithë shkelësit do të ndërmerren procedurat përkatëse.
Kontrollet në komunikacion do të vazhdojnë edhe në periudhën e ardhshme.