Klubi i karatesë „Bashkimi 2002“, i udhëhequr nga trajneri Mursel Misini, më 13 qershor në Sallën Sportive të Kumanovës do ta organizojë edicionin e parë të turneut ndërkombëtar të karatesë „Kumanova Open 2026“.
Sipas organizatorëve, në turne pritet pjesëmarrja e një numri të madh garuesish nga disa shtete, përfshirë karateistë me suksese evropiane dhe botërore.
Ngjarja paraqet një mundësi për promovimin e sportit të karatesë, por edhe për afirmimin e Kumanovës në skenën ndërkombëtare sportive.
Organizatorët i ftojnë qytetarët të marrin pjesë në turne, të shijojnë paraqitje atraktive të karatesë dhe të njihen më afër me këtë sport.
Njëkohësisht, u bëhet thirrje kompanive, biznesmenëve dhe të gjithë subjekteve me përgjegjësi shoqërore që ta mbështesin organizimin e ngjarjes sipas mundësive të tyre.
Sipas organizatorëve, mbështetja financiare do të ndihmojë në realizimin e suksesshëm të turneut dhe në prezantimin dinjitoz të Kumanovës para mysafirëve vendas dhe të huaj.
„Kumanova Open 2026“ synon të shndërrohet në një ngjarje tradicionale ndërkombëtare sportive dhe në një krenari të re sportive për Kumanovën.