Deponia „Krasta“ në Kumanovë në të ardhmen do të mbyllet, do të sanohet dhe do të shndërrohet në një stacion modern transferimi, prej ku mbeturinat nga i gjithë Rajoni Planor Verilindor do të transportohen drejt fabrikës për përpunimin e mbeturinave pranë Sveti Nikollës.
Këtë e bëri të ditur Maksim Dimitrievski gjatë sqarimit të vendimeve që lidhen me sistemin rajonal të menaxhimit të mbeturinave.
Sipas tij, projekti ka filluar para më shumë se 13 vitesh si grant i Bashkimit Evropian dhe synon të sigurojë një zgjidhje afatgjatë për problemin e mbeturinave në Rajonin Planor Verilindor dhe atë Lindor.
Sistemi parashikon që mbeturinat fillimisht të grumbullohen në stacione transferimi dhe më pas të transportohen në një fabrikë qendrore për përpunim.
Një nga stacionet e transferimit për rajonin verilindor do të vendoset në lokacionin e deponisë Krasta, ndërsa një tjetër në Rankocë.
Sipas studimit ekzistues të financuar nga Bashkimi Evropian, fabrika për përpunimin e mbeturinave duhet të ndërtohet pranë Sveti Nikollës.
Në kuadër të projektit është themeluar edhe ndërmarrja publike rajonale „Eko Istok-Severoistok“, ku marrin pjesë 15 komuna nga të dy rajonet.
Dimitrievski theksoi se përfitimi më i madh për Kumanovën do të jetë mbyllja e deponisë Krasta, e cila për dekada me radhë ka qenë problem ekologjik për qytetin.
Pas mbylljes, deponia do të sanohet, do të largohet gazi metan, do të mbulohet me sasi të mëdha dheu dhe do të pyllëzohet.
Në një pjesë të lokacionit do të ndërtohet një stacion modern transferimi për grumbullimin dhe transportimin e mbeturinave.
Sipas tij, projekti do të mund të sigurojë një zgjidhje afatgjatë për 15 komunat pjesëmarrëse dhe të mundësojë prodhimin e biogazit dhe kompostit nga mbeturinat.