Tre automjete të reja zjarrfikëse do t’i vihen në dispozicion Njësisë Territoriale të Zjarrfikësve në Kumanovë si donacion në kuadër të bashkëpunimit ndërmjet Komunës së Kumanovës dhe rajonit austriak Tirol.
Lajmin e bëri të ditur kryetari i Komunës së Kumanovës, Maksim Dimitrievski, i cili njoftoi se përfaqësues të njësisë zjarrfikëse dhe të Shoqatës Vullnetare të Zjarrfikësve morën pjesë në një trajnim pesëditor në Tirol.
Trajnimi ishte i fokusuar në luftimin e zjarreve në hapësira të hapura dhe shpëtimin e personave nga lartësitë.
Përmes ushtrimeve praktike, zjarrfikësit fituan njohuri dhe aftësi të reja që do t’i ndajnë me kolegët e tyre në njësinë lokale.
Ata gjithashtu patën mundësinë të njihen nga afër me sistemin austriak të zjarrfikjes dhe mënyrën e funksionimit të shoqatave vullnetare të zjarrfikësve.
Donacioni i tre automjeteve paraqet vazhdim të bashkëpunimit që Kumanova po zhvillon prej vitesh me partnerët austriakë.
Vitin e kaluar komuna mori edhe një automjet modern zjarrfikës me kosh shpëtimi dhe shkallë hidraulike 32 metra të lartë, gjithashtu si donacion nga Tiroli.
Automjeti përdoret për intervenime në ndërtesa të larta, shpëtim personash nga lartësitë dhe shuarjen e zjarreve në objekte shumëkatëshe.
Autoritetet lokale presin që pajisjet e reja dhe trajnimet në Austri të rrisin më tej gatishmërinë e zjarrfikësve të Kumanovës për t’u përballur me zjarre dhe situata të tjera emergjente, veçanërisht gjatë sezonit veror kur rreziku nga zjarret është më i lartë.