Qeveria ka vendosur të vazhdojë masën për uljen e akcizave të derivateve të naftës deri më 15 qershor.
Njëkohësisht, pas bisedimeve me OKTA, furnizuesin më të madh vendor të karburanteve, është siguruar edhe një zbritje shtesë prej dy denarësh për litër karburant, e cila hyn në fuqi nga sot, 1 qershor.
Sipas llogaritjeve të Qeverisë, këto masa pritet të ulin çmimin e naftës me 6,5 denarë për litër, ndërsa benzina pritet të jetë më e lirë për rreth 1,5 denarë për litër.
Nga Qeveria theksojnë se masat përfaqësojnë mbështetje të drejtpërdrejtë për qytetarët, sektorin e transportit, fermerët dhe bizneset.
Sipas autoriteteve, ulja e çmimeve të karburanteve do të ndikojë në uljen e kostove të jetesës dhe të veprimtarisë ekonomike, si dhe në ruajtjen e stabilitetit të çmimeve në kushtet e sfidave globale ekonomike.
“Në fokusin e Qeverisë mbeten politikat që sjellin përfitime konkrete për qytetarët dhe forcojnë sigurinë ekonomike”, thuhet në njoftim.