Mbrëmë në Shtëpinë e Zejtarëve në Kumanovë u hap solemnisht edicioni i tetë i Festivalit Ndërkombëtar të Filmit të Shkurtër “Filmaj”.
Gjatë manifestimit dyditor, që mbahet më 27 dhe 28 maj, publikut iu prezantuan 16 filma të shkurtër nga produksione vendore dhe ndërkombëtare.
Çmimet e sivjetshme u ndanë nga juria e përbërë nga skenaristja dhe regjisorja Eleonora Veninova, aktorja Angela Stojanovska dhe regjisori Gheorghe Todria.
Filmi më i mirë maqedonas u shpall “Ishulli”, me skenar dhe regji nga Branko Kosteski.
Çmimi “Lazar Gjorgjeviq” për regjinë më të mirë iu nda Bálint Kenyeres për filmin “Shfaqja”, ndërsa çmimi “Radislav Ristevski” për kinematografinë më të mirë iu dha Gianluca Palma për filmin “Armiku”.
Autori Dian Weiss fitoi çmimin “Kozjak” për skenarin më të mirë me filmin “Shkabat”, ndërsa çmimi kryesor i festivalit “FILMAJ” për filmin më të mirë të shkurtër iu nda filmit “Hipopotamët”, me skenar dhe regji nga J.J. Lin.
Në përzgjedhjen zyrtare u përfshinë edhe tre filma vendorë: “Zgjedhja”, me regji të Marko Crnogorskit, “Lepuri” i Hanis Bagashovit dhe “Një shaka e vogël”, me regji të Trifun Sitnikovskit.
Publikut iu prezantuan edhe filmat “Mirë se vini në shtëpi”, “Norheimsund”, “Qeni dhe Ujku”, “Agapito”, “Ali”, “Kojotët”, “Çokollata” dhe “Tension i lartë”.
Festivali organizohet nga Klubi Foto-Kino “Kozjak”, me mbështetjen e Fondacionit për Kulturë dhe Sport Kumanovë, në kuadër të Programit për Manifestime Kulturore të Komunës së Kumanovës për vitin 2026.