Kryetari i Komunës së Kumanovës, Maksim Dimitrievski, i hedh poshtë ashpër pretendimet e OO të LSDM-së në Kumanovë lidhur me procedurën për huamarrjen afatgjatë vendore, duke i vlerësuar ato si të pasakta dhe manipuluese.
Ai thekson se Komuna e Kumanovës do t’i shfrytëzojë të gjithë mekanizmat ligjorë për të dëshmuar korrektësinë e procedurës.
Në vazhdim po e përcjellim reagimin integral të Dimitrievskit:
„Në tërësi dhe me dënimin më të ashpër i hedh poshtë si dashakeqe, të pasakta dhe manipuluese pretendimet e paraqitura në konferencën për shtyp të Organizatës Komunale të LSDM-së Kumanovë, lidhur me procedurën për huamarrjen afatgjatë vendore të Komunës së Kumanovës. Është e qartë se, në mungesë të ideve dhe projekteve të tyre për të mirën e qytetarëve, dega lokale e LSDM-së është reduktuar në politikë ditore dhe përhapje të vetëdijshme të dezinformatave, duke u përpjekur të bllokojë zhvillimin e Kumanovës dhe të sabotojë projektet kyçe për një jetë më të mirë për të gjithë ne.
Triumfalizmi i tyre, i bazuar në një procesverbal preliminar dhe juridikisht të pambështetur nga mbikëqyrja inspektuese, është vetëm një dëshmi tjetër e nevojës së tyre të dëshpëruar për të krijuar një imazh të rremë të një ‘paligjshmërie’ të supozuar, aty ku ekziston vetëm punë transparente dhe e përgjegjshme në interes të qytetarëve.
Procedura e huamarrjes është plotësisht ligjore, ndërsa konstatimet e inspektorit janë rezultat i interpretimit të gabuar të së drejtës
E informoj publikun se konstatimet e Inspektorit Shtetëror për Vetëqeverisje Lokale, të përfshira në Procesverbalin IP1 numër 21-702 të datës 04.08.2026, janë plotësisht të pabazuara dhe burojnë nga një interpretim i njëanshëm dhe fjalë për fjalë i ligjit, i cili është në kundërshtim të drejtpërdrejtë me dispozitat e tjera ligjore në fuqi dhe me vetë logjikën e procedurës.
Për këtë arsye, Komuna e Kumanovës, brenda afatit të paraparë me ligj, do të paraqesë Kundërshtim të detajuar dhe të argumentuar kundër procesverbalit të lartpërmendur, në përputhje me nenin 22 të Ligjit për Inspektoratin Shtetëror për Vetëqeverisje Lokale. Jemi të bindur në korrektësinë e procedurës sonë dhe të gatshëm ta dëshmojmë atë para të gjitha institucioneve kompetente, përfshirë edhe Gjykatën Kushtetuese, nëse inspektorati, i udhëhequr nga motive politike, këmbëngul në qëllimin e tij.
Për informimin e vërtetë të qytetarëve, jam i obliguar të sqaroj se procedura për huamarrje afatgjatë është një proces kompleks, shumëfazësh, të cilin LSDM-ja dhe eksponentët e saj partiakë në inspektorat ose nuk e kuptojnë, ose e injorojnë me vetëdije:
1. Vendimi fillestar i Këshillit është vetëm një hap fillestar dhe jo miratim përfundimtar. Vendimi për huamarrje afatgjatë vendore nr. 09-9837/31, i cili është objekt i sulmit, nuk përfaqëson miratim përfundimtar të kredisë. Ai është parakusht i detyrueshëm dhe i domosdoshëm për fillimin e procedurës. Konkretisht, neni 16, paragrafi (4) i Ligjit për Borxhin Publik kërkon në mënyrë eksplicite që, për të marrë pëlqimin e Ministrisë së Financave, komuna duhet të dorëzojë pikërisht ‘Vendim për Huamarrje’. Pa këtë vendim, e gjithë procedura bllokohet që në fillim.
2. Debati publik duhet të mbahet kur kushtet e huamarrjes janë të njohura. Sipas nenit 20, paragrafi (2) të Ligjit për Financimin e Njësive të Vetëqeverisjes Lokale, objekt i debatit publik janë ‘përshkrimi i projektit dhe kushtet e financimit të tij’. Si mund të diskutohet për kushtet (normat e interesit, afatet, komisionet) kur ato ende nuk dihen? Kushtet mësohen vetëm pasi të merret pëlqimi nga Ministria dhe të mblidhen ofertat nga bankat komerciale. Mbajtja e debatit publik para kësaj do të ishte formalizëm i pastër dhe shmangie e ligjit dhe vullnetit të qytetarëve – diçka që është karakteristike për LSDM-në, por jo për ne. Synimi ynë është që debati publik të jetë thelbësor, transparent dhe të mbahet para miratimit përfundimtar të kontratës konkrete të kredisë, kur qytetarët do të mund të vendosin mbi bazën e të dhënave konkrete dhe reale.
Interpretimi i inspektorit, të cilin LSDM-ja e mbështet verbërisht, krijon një absurditet juridik dhe qorrsokak procedural që e bën huamarrjen për projekte kapitale praktikisht të pamundur. Kjo vetëm e konfirmon tezën tonë se nuk bëhet fjalë për shqetësim për ligjshmërinë, por për obstruksion të qëllimshëm politik.
Qëllimi i LSDM-së është bllokimi i Kumanovës, e jo sundimi i ligjit
Qëllimi i vërtetë i kësaj fushate të koordinuar të LSDM-së dhe strukturave të afërta me të në institucionet shtetërore është të parandalohet realizimi i projektit ‘Ndërmarrje publike eko-efikase’. Ky projekt parashikon blerjen e automjeteve të reja dhe moderne për grumbullimin e mbeturinave për NP ‘Pastërtia dhe Gjelbërimi’ dhe instalimin e sistemeve fotovoltaike për NP ‘Ujësjellësi’, me çka përmirësohen drejtpërdrejt shërbimet publike dhe kursehen paratë e qytetarëve.
Në vend që të luftojnë për një qytet më të pastër dhe ujë më të lirë, këshilltarët e LSDM-së dhe qendra e tyre partiake luftojnë kundër kësaj. Në vend që të përshëndesin punën e përgjegjshme, ata paraqesin ankesa dhe festojnë procesverbalet preliminare, duke shpresuar se do ta ndalin zhvillimin e Kumanovës. Kjo është kulmi i hipokrizisë politike dhe dëshmi se për ta interesat partiake janë gjithmonë mbi interesat e qytetarëve.
Në njoftimin e tyre, ata flasin për ‘qëllime kriminale’ dhe kërkojnë ‘përgjegjësi morale, politike dhe ligjore’. Kualifikime të tilla nuk janë vetëm të pabazuara, por edhe shpifëse. Praktika gjyqësore tregon qartë se, ndonëse debati politik lejon një shkallë më të lartë kritike, paraqitja e pretendimeve të pavërteta për krime të supozuara përbën bazë për përgjegjësi civile. Ne nuk do të zbresim në nivelin e tyre dhe të merremi me padi, sepse koha dhe energjia jonë i kushtohen punës për qytetarët, e jo labirinteve gjyqësore. Megjithatë, publiku duhet ta dijë se metodat e tyre bazohen në gënjeshtra dhe konstruktime.
Do ta dëshmojmë ligjshmërinë dhe do ta realizojmë projektin
I siguroj qytetarët e Kumanovës se nuk do të lejojmë që lojëra të tilla të politikës ditore të na pengojnë në realizimin e qëllimeve të përcaktuara. Komuna e Kumanovës do t’i shfrytëzojë të gjithë mekanizmat ligjorë për të dëshmuar korrektësinë e veprimeve të saj. Jemi të bindur se çdo institucion i paanshëm do ta konfirmojë atë që po themi – se procedura është ligjore dhe në interesin më të mirë të qytetarëve. Aktet administrative të miratuara mbi bazën e interpretimit të gabuar të ligjit anulohen rregullisht nga gjykatat. Pikërisht këtë presim edhe në këtë rast.
I ftoj këshilltarët e LSDM-së, nëse kanë qoftë edhe pak dinjitet dhe përgjegjësi ndaj qytetarëve që i kanë zgjedhur, të ndalojnë me obstruksionet dhe të fillojnë të punojnë për të mirën e Kumanovës. Roli i tyre është të jenë korrigjues të pushtetit, e jo pengesë e tij. Bllokimi i projekteve nuk është politikë, por destruksion në dëm të të gjithëve ne.
Vazhdojmë të punojmë me përkushtim, transparencë dhe në përputhje me ligjet, për një Kumanovë moderne dhe evropiane“, thuhet në reagim.