Me një ceremoni solemne në kazermën “Boro Menkov” në Kumanovë, sot u shënua zyrtarisht përfundimi i misionit gjashtëvjeçar të Komandës së Brigadës së Evropës Juglindore (SEEBRIG) në Republikën e Maqedonisë së Veriut.
Në periudhën e ardhshme Komanda do të zhvendoset në Stamboll, Republika e Turqisë.
Në ceremoni morën pjesë ministri i Mbrojtjes Vlado Misajlovski, shefi i Shtabit të Përgjithshëm të Armatës së Republikës së Maqedonisë së Veriut Sashko Lafçiski, trupi diplomatik dhe delegacione nga shtetet anëtare të iniciativës.
Komandanti i SEEBRIG-ut, gjeneral brigade Bilbil Bitri, tha se largimi nga Kumanova shoqërohet me ndjenja të përziera, duke theksuar se qyteti gjatë gjashtë viteve të fundit ka qenë shumë më tepër se vendndodhja e shtabit.
“Gjatë gjashtë viteve të fundit, Kumanova ishte më shumë se thjesht vendndodhja e shtabit tonë – ishte shtëpia jonë,” tha Bitri, duke falënderuar Qeverinë, Ministrinë e Mbrojtjes, Armatën, Komunën e Kumanovës dhe qytetarët për mbështetjen dhe mikpritjen.
Ai vlerësoi se gjatë qëndrimit në Maqedoninë e Veriut janë forcuar interoperabiliteti shumëkombësh, bashkëpunimi ushtarak rajonal dhe partneritetet ndërmjet vendeve pjesëmarrëse.
“Edhe pse shtabi mund të zhvendoset, miqësitë dhe partneritetet e krijuara gjatë këtyre gjashtë viteve do të zgjasin. Që tani e tutje, Kumanova dhe Maqedonia e Veriut do të kenë gjithmonë një vend të veçantë në historinë e SEEBRIG-ut,” deklaroi komandanti Bitri.