Delegacioni i Bashkimit Evropian në Maqedoni do të hapë një Europe House në Kumanovo, ndërsa komuna sot miratoi dhënien në shfrytëzim të një hapësire për këtë qëllim.
Këshilli i Komunës së Kumanovës miratoi vendimin për t’i dhënë Delegacionit të BE-së në përdorim pa pagesë një hapësirë afariste për periudhë tetëvjeçare në qendrën e qytetit.
Bëhet fjalë për një objekt prej 48 metrash katrorë në Shtëpinë e Zejtarëve në qendër të Kumanovës, ku më parë funksiononte një lokal.
Europe House për Rajonin Planor Verilindor deri më tani ka funksionuar në Kriva Palanka dhe është hapur në shkurt të vitit 2021 si projekt i Delegacionit të BE-së i dedikuar të rinjve.
Qendra shërben si vend për takime, edukim dhe rrjetëzim, ku organizohen debate, aktivitete kulturore, punëtori, ekspozita, projeksione filmash dhe aktivitete të lidhura me programet e Bashkimit Evropian.
Sipas të dhënave zyrtare, gjatë viteve aty janë organizuar qindra aktivitete me pjesëmarrjen e mijëra të rinjve nga rajoni verilindor.
Kryetarja e Këshillit Komunal, Ivana Gjorgjievska, deklaroi se deri më tani Kumanova nuk kishte hapësirë të përshtatshme që plotësonte kërkesat e Bashkimit Evropian.
Anëtarja e Këshillit, Monika Markovska, vlerësoi se hapja e këtij qendre do t’u sjellë të rinjve mundësi për trajnime, punëtori, informim për programet Erasmus, si dhe zhvillim të aftësive gjuhësore dhe të teknologjisë informative pa pagesë.
Me këtë vendim, Kumanova pritet të marrë për herë të parë një Europe House, e cila do të shërbejë si qendër rajonale për aktivitete rinore, edukim dhe promovim të programeve evropiane në Rajonin Planor Verilindor.