Vazhdojnë punimet për rikonstruksionin e plotë të rrugës “Mosha Pijade” në Kumanovë.
Kryetari i Komunës, Maksim Dimitrievski, njoftoi se aktualisht po ndërtohet kanalizimi atmosferik në një pjesë të rrugës, si dhe po vendoset infrastrukturë nëntokësore optike për nevojat e operatorëve kabllorë.
Rikonstruksioni po realizohet në disa faza. Komuna e Kumanovës kishte njoftuar më herët se projekti përfshin rinovimin e plotë të rrugës, duke përfshirë heqjen e asfaltit dhe bordurave ekzistuese përgjatë pothuajse gjithë gjatësisë dhe gjerësisë së saj.
Në fazën e kaluar, shtresa e asfaltit u hoq në segmentin nga Piano Prestige deri në fund të rrugës “Mosha Pijade”, ku u zëvendësua edhe rrjeti i kanalizimit, ndërsa më pas filloi vendosja e bordurave të reja.
Faza e ardhshme vazhdon në pjesën e rrugës që të çon drejt qendrës së qytetit.
Për shkak të punimeve, pritet të vazhdojnë vështirësitë në qarkullim dhe kufizimet për automjetet.
Komuna e Kumanovës u bën thirrje qytetarëve të mos i parkojnë automjetet pranë zonave ku po punohet, për të mundësuar zhvillimin e sigurt dhe të pandërprerë të punimeve.
Projekti për ndërtimin e kanalizimit atmosferik dhe rikonstruksionin e rrugës “Mosha Pijade” financohet nga Banka Botërore përmes Ministrisë së Transportit të Maqedonisë së Veriut.
Pas përfundimit të punimeve, rruga do të ketë një pamje krejtësisht të re dhe infrastrukturë të përmirësuar për të gjithë pjesëmarrësit në trafik.