Ministria e Punëve të Brendshme ka ngritur kallëzime penale kundër gjashtë personave për organizimin dhe realizimin e një birësimi të paligjshëm të një fëmije.
Sipas policisë, Njësia Kombëtare për Luftimin e Kontrabandimit të Migrantëve dhe Trafikimit me Njerëz ka paraqitur kallëzim penal kundër F.A. (63), G.K. (57), I.Sh. (35), Xh.Sh. (35), të gjithë nga Shkupi, si dhe kundër S.J. (35) nga Kumanova dhe I.A. (38) nga Tetova për shkak të dyshimeve për veprën penale „trafikim me fëmijë“.
Sipas hetimeve, gjatë viteve 2024 dhe 2025, F.A. dhe G.K. kanë organizuar birësimin e paligjshëm të një foshnjeje të porsalindur.
F.A., duke shfrytëzuar pozitën e saj si kujdestare e fëmijëve, ka krijuar kontakte me çifte të interesuara, ndërsa G.K. ka identifikuar prindër në gjendje të rëndë sociale dhe materiale me qëllim shmangien e procedurave ligjore të birësimit.
Policia thotë se prindërit janë bindur të pranojnë birësimin e paligjshëm të foshnjës së tyre në këmbim të përfitimeve financiare dhe benefiteve të tjera.
Sipas njoftimit, S.J. nga Kumanova, e cila jetonte në bashkësi jashtëmartesore me I.A., është bindur të pranojë birësimin e paligjshëm të foshnjës së saj në këmbim të 500 eurove dhe kontrolleve gjinekologjike falas.
Pas daljes nga spitali, S.J. dhe foshnja e saj janë dërguar në shtëpinë e F.A., ku I.Sh. dhe Xh.Sh., në cilësinë e prindërve birësues, e kanë marrë foshnjën dhe e kanë dërguar në shtëpinë e tyre.
Po ashtu, më 17 tetor 2025 është lidhur një kontratë huaje prej 500 eurosh ndërmjet Xh.Sh. si huadhënës dhe I.A. si huamarrës, ndërsa kjo shumë dyshohet se është paguar si kompensim për birësimin e paligjshëm.
Për të dyshuarit është caktuar masa e arrestit shtëpiak.