Gjithsej 12 litra shi për metër katror ranë dje në rajonin e Kumanovës, njoftojnë nga Drejtoria për Punë Hidrometeorologjike.
Sasia më e madhe e reshjeve u regjistrua në Mavrovë, me 30 litra për metër katror, ndërsa më e vogla në Gjevgjeli, me vetëm një litër për metër katror.
Moti sot në Maqedoni do të jetë me vranësira të ndryshueshme dhe reshje të kohëpaskohshme shiu, të shoqëruara lokalisht me bubullima.
Në disa vende proceset mund të jenë më intensive dhe të shoqërohen me stuhi, reshje më të dendura deri në 20 litra për metër katror, shkarkime elektrike, erë të fortë dhe breshër.
Temperatura maksimale do të lëvizë nga 21 deri në 29 gradë Celsius.
Në Kumanovë dhe rrethinë pritet mot i ndryshueshëm me kushte për jostabilitet gjatë orëve të pasdites.
Do të fryjë erë e dobët deri mesatare nga drejtimi verior dhe veriperëndimor.
Temperatura e mëngjesit do të jetë rreth 10 gradë, ndërsa ajo maksimale ditore pritet të arrijë deri në 22 gradë Celsius.
Për rajonin e Kumanovës janë lëshuar dy paralajmërime meteorologjike: një paralajmërim portokalli për reshje të dendura shiu dhe një paralajmërim i verdhë për stuhi me bubullima.
Kushte për mot jostabil priten edhe të shtunën, si dhe sërish nga e marta e javës së ardhshme.