WHC Kumanovo fitoi në terren vendas ndaj RK Spartak me rezultat 37:32, duke siguruar kualifikimin në sezonin e ardhshëm të EHF European Cup.
Ndeshja ofroi një pjesë të parë shumë interesante, ku të dy ekipet luajtën gol pas goli dhe asnjëra nuk arriti të krijojë epërsi të konsiderueshme.
Skuadrat shkuan në pushim me rezultat të barabartë, ndërsa në pjesën e dytë hendbollistet e Kumanovës u rikthyen fuqishëm dhe në fund triumfuan me pesë gola diferencë.
Me këtë fitore, ekipi i drejtuar nga trajneri Aleksandar Bojkovski jo vetëm që forcoi pozitën e katërt në tabelë, por siguroi edhe pjesëmarrjen në garat evropiane sezonin e ardhshëm.
Më e dalluara te Kumanova ishte portugezja Mariana Silva Azevedo me 13 gola. Nena Nestorovska realizoi nëntë gola, ndërsa braziliania Amanda Stein shtoi shtatë të tjerë.
Te mysafiret më efikasja ishte Anastasija Nikolovska me 12 gola, ndërsa Sara Cvetanovska realizoi 10 gola.
Deri në fund të sezonit kanë mbetur edhe dy xhiro. Të dielën Kumanova pret WHC Chair, ndërsa më pas sezonin do ta mbyllë kundër WHC Pelister.
Pozita e katërt në renditje tashmë është e garantuar për ekipin e Kumanovës.