Вкупно 108 лица осудени за извршени кривични дела во Куманово минатата година

Сподели со своите пријатели

Вкупно 108 лица во текот на 2015 година биле осудени за кривични дела изврешени на територијата на Општина Куманово, додека пак Основен суд Куманово донел пресуди за 84 лица, според податоците на Државниот завод за статистика.

Од осудените лица за кривични дела извршени во Куманово 43 се Македонци, 28 се припадници на албанската наицоналност, еден Турчин, 22 се припадници на ромската заедница, еден е Србин, додека за останатите 13 не се наведени податоци. Осудено е и едно малолетно лице и тоа за сторено кривично дело против имот.

Само за споредба, за сторени кривични дела на подрачјето на Општина Липково осудени се вкупно 12 лица, од кои 10 Албанци и двајца Бошњаци.

Основниот суд Куманово пак минатата година донел пресуди против 84 лица кои го прекршиле законот, а девет од нив се за припаднички на понежниот пол. Од вкупниот број 36 се казни, од кои 27 затворски, а осум парични, 48 лица добиле условна казна затвор, а имало и пресуда за едно протерување.

Минатата година имало и пријави за деца кои извршиле кривични дела. Па така на подрачјето на Куманово се регистрирани 43 случаи. Најголем дел се за кривични дела против имот, седум за нарушување на јавен ред и мир, четири кривични дела против безбедноста во јавниот сообраќај, а три кривични дела против живот и телото.

Компаративно, во Општина Липково имало пријавени само торјца малолетници од кои двајца за кривични дела против имот, а еден против безбедност во јавниот сообраќај.

Гледано на ниво на Република Македонија забележителен е тренд на опаѓање кога станува збор за бројот на пријавени полнолетни лица. Во 2015 година нивната бројка изнесува 26.069  лица, додека година претходно бројката била драстично поголема 37.164.

Тренд на опаѓање е забележителен и кај пријавени деца за сторени кривични дела, па така ако во 2014 година биле регистрирани 1.005 вакви случаи, минатата година биле регистрирани 772.