Заменик претседателот на Владата задолжен за европски прашања Бојан Маричиќ денеска е во еднодневна посета на Црна Гора, каде ќе учествува на годишниот Самит на Демократијата во Југоисточна Европа, посветен на „Војната во Европа: Влијанието на Балканот“, во организација на Меѓународниот републикански институт (ИРИ).
Вицепремиерот Маричиќ ќе се обрати на панел дискусијата на тема: Променливата политичка и безбедносна динамика во Западен Балкан, заедно премиерот на Црна Гора, Дритан Абазовиќ, претседателката на Косово, Вјоса Османи, претставникот на ЕУ за дијалогот Белград-Приштина и други регионални прашања од Западен Балкан, Мирослав Лајчак, Курт Волкер, поранешен амбасадорот САД во НАТО и поранешен специјален претставник за Украина и Стјуарт Пич, специјален претставник на Обединетото Кралство за Западен Балкан.
Маричиќ во рамки на Самитот ќе има билатерална средба со премиерот на Црна Гора, Дритан Абазовиќ, на која тема на разговор ќе бидат политичките случувања на домашна и меѓународна сцена, напредокот во реформите и евроинтеграциите и унапредување на регионалната соработка во пресрет на одржување на Самитот на „Отворен Балкан“.
На овогодишниот Самит на ИРИ учествуваат високи владини претставници од Соединетите Американски Држави, Европа и регионот, како и аналитичари, отворено да разговараат за клучните теми кои се однесуваат на стабилноста на регионот, со фокус на последиците од војната на Русија против Украина на Западен Балкан.