Раководството на ТикТок разговара за можноста за одвојување од ByteDance Ltd, нејзината кинеска матична компанија, за да се смири загриженоста за ризиците за националната безбедност, известува Yahoo Finance.
Одвојувањето, кое може да резултира со продажба или иницијална јавна понуда, се смета за последна опција, која треба да се спроведе само доколку постоечкиот предлог на ТикТок не помине кај претставниците на националната безбедност, рекоа извори информирани за ова прашање.
Дури и тогаш, кинеската влада ќе мора да се согласи на таква трансакција, додаваат тие.
Бизнисот на ТикТок во Америка може да се процени на 40 до 50 милијарди долари, според аналитичарите на Блумберг, Мандип Синг и Демијан Рајмерц.
– Не мислиме дека некоја голема технолошка фирма би можела да биде заинтересирана за купување на ТикТок, но фокусот на Мајкрософт на Bing и ChatGPT може да го поттикне интересот за додавање видео платформа како ТикТок за да се натпреварува со YouTube на Alphabet, особено ако договорот „Microsoft-Activision“ пропадне – додаваат аналитичарите.
Одделот за правда не сакаше да го прифати предлогот на ТикТок, според луѓе запознаени со ова прашање.
– Ниту забраната на ТикТок ниту одвојувањето од ByteDance не придонесуваат за загриженоста за националната безбедност поврзана со преносот на податоци – рече Брук Оберветер, портпарол на ТикТок.
– Како дел од проектот во Тексас, податоците на ТикТок за нашите американски корисници ќе се чуваат според значително повисоки безбедносни стандарди од која било американска компанија – додава тој.
Изгледите за ТикТок во Конгресот
ТикТок, исто така, се соочува со голем број потенцијални нацрт-закони во Конгресот, од кои некои би наложиле разделување.
Законодавците, загрижени дека апликацијата би можела да биде принудена да споделува податоци со кинеската влада или дека Кина може да ја користи како алатка за влијание, предложија повеќе нацрт-закони со двопартиска поддршка кои бараат забрана на апликацијата за споделување видео или нејзина продажба.
Од извршниот директор на ТикТок, Шоу Чу, беше побарано да сведочи пред комисијата на Претставничкиот дом следната недела за практиките за приватност и безбедност на апликацијата, како и за односот на компанијата со Кинеската Комунистичка партија.
ByteDance беше проценет на околу 220 милијарди долари во неодамнешната приватна пазарна инвестиција од G42 со седиште во Абу Даби, објави Блумберг.
Г42, контролиран од кралскиот шеик на Обединетите Арапски Емирати, шеикот Тахнун бин Зајед Ал Нахјан, купи удел од 100 милиони долари од постоечки инвеститори во последниве месеци преку својот Фонд 42X, рекоа луѓе запознаени со ова прашање.
Друг фонд го купи ByteDance набргу потоа за 225 милијарди долари.
Да потсетиме, ТикТок неодамна беше забранет на владините уреди во Европската Унија, Америка и Канада.