Топењето на мразот поради високите температури создаде загриженост кај научниците, а некои од нив стравуваат дека доколку сè околу нас продолжи да се топи, би можеле да започнат да нè прогонуваат антички вируси.
„Топењето не само што ќе доведе до губење на овие антички, архивирани микроби и вируси, туку ќе ги ослободи во животната средина во иднина“, пишуваат истражувачите во новата студија објавена во „Микробиом“, предводена од микробиологот Џи-Пинг Јонг од Охајо.
Благодарение на новите метагеномски техники и новите методи за одржување на стерилизирани примероци од ледено јадро, истражувачите работат на подобро разбирање што точно има во ладните простори.
Во новата студија, тимот бил во можност да идентификува архива на десетици уникатни вируси стари 15.000 години од ледената капа Гулија на Тибетското плато и да добие увид во нивните функции.
„Овие глечери постепено се формирале, и заедно со прашината и гасовите, многу вируси се населиле во тој мраз“, рече Јонг.
Овие микроби потенцијално ги претставуваат оние во атмосферата за време на нивното таложење, објаснува тимот во својот труд.
Во рамките на овие замрзнати записи од антиката, истражувачите откриле дека 28 од 33 вируси што ги идентификувале никогаш порано не биле видени.
„Ова се вируси кои би напредувале во екстремни средини“, рече микробиологот Метју Саливан од Државниот универзитет во Охајо.
Споредувајќи ги нивните генетски секвенци со базата на податоци за познати вируси, тимот открил дека најраспространети вируси во двата примерока на ледено јадро се бактериофагите кои инфицираат Метилобактериум – бактерии важни за циклусот на метан во мразот.
Тие биле главно поврзани со вируси кои се наоѓаат во соединенијата на Метилобактериум во живеалиштата на растенијата и почвата.
„Овие замрзнати вируси најверојатно потекнуваат од почвата или растенијата и им го олеснуваат собирањето на хранливи материи на нивните домаќини“, заклучи тимот.