Пропагандните медиуми во Северна Кореја ја фалат хит серијата на Нетфликс „Squid Game“, наведувајќи дека ја открива реалноста на јужнокорејската капиталистичка култура каде „корупцијата и неморалните измамници се секојдневие“.
Севернокорејскиот сајт „Ариранг Меари“ цитира неименувани јужнокорејски филмски критичари кои велат дека „Squid Game“ покажува „дух на нееднаквост каде луѓето без пари се третираат како шаховски фигури за богатите“, пренесува Ројтерс.
Јужнокорејската серија за луѓе во долгови кои се натпреваруваат за смртоносни верзии на игри за деца за вредна парична награда, за кратко време стана глобален хит и најгледана содржина на стриминг платформата Netflix.
„Серијата ја открива тажната реалност на бруталното јужнокорејско општество што ги води луѓето до екстремна конкуренција и бришење на нивната човечност“, се наведува на веб – страницата на Северна Кореја.
Ројтерс потсетува дека репресивниот режим во Северна Кореја воведе строги казни за граѓаните кои уживаат во јужнокорејската поп – култура или користат сленг на своите јужни соседи.
„Squid Game“, сепак, не е првото јужнокорејско достигнување што доби јавен благослов од Пјонгјанг.
Филмот оскаровец „Паразит“ од 2020 година беше оценет во севернокорејските медиуми како ремек – дело што „остро ја открива реалноста“ за јазот меѓу богатите и сиромашните во Јужна Кореја.