Станбена зграда во египетската престолнина Каиро се сруши денес, а еден човек го загуби животот, соопштија египетските власти.
Спасувачките екипи, кои го извлекоа телото на мажот, избезумено се обидуваат да ја извлечат неговата сопруга од под четирикатница во градскиот кварт Варак, пренесува агенцијата АП.
Спасувачките екипи можеа да разговараат со неа низ урнатините, а таа сè уште беше жива, соопштија официјалните лица.
Властите отворија истрага, објави египетската новинска агенција МЕНА.
Сè уште не е јасно што го предизвикало колапсот, но ваквите инциденти, според АП, се чести во Египет, каде лошата градба е широко распространета во селата, сиромашните квартови и руралните области.
Минатиот месец најмалку пет жени беа убиени кога се урна станбена зграда во Александрија.
Друга зграда во Каиро се сруши во март, кога животот го загубија најмалку 25 лица.