Републиканците во Претставничкиот дом го предупредија сопственикот на Твитер, Илон Маск, дека терористичките организации бараат начини да ја засилат својата пропаганда на социјалната мрежа.
Републиканците Пет Фалон, Кит Селф, Рони Џексон и Џејмс Мојлан испратија писмо до Маск барајќи одговор за тоа како Твитер може да спречи злоупотреба на неговата платформа и како се спроведува процесот на проверка на некој да добие син чек, пишува „Вашингтон Тајмс“.
„Неодамнешните извештаи за талибанците кои сами ги потврдуваат своите профили на Твитер предизвикаа загриженост дека тие би можеле да користат алгоритми за ширење омраза, радикализам и терористичка пропаганда. Важно е да се знае дека САД не ги признаваат Талибанците како легитимна влада на Авганистан“, се вели во писмото.
Фалон изјави дека другите групи, како терористичката Исламска држава, бараат нови методи за да допрат до пошироката јавност преку Интернет.
„На крајот на денот, не смееме да дозволиме овие убиствени групи да ги злоупотребуваат американските платформи за да ги угнетуваат жените, да ги забранат верските слободи, демократијата и етничките малцинства“, рече Фалон во изјавата.