Регистрацијата на нови патнички автомобили во Европската Унија се зголеми во април за 5,1 процент на годишно ниво, на 972.314 возила, што претставува трет последователен месец на раст на пазарот, објави денес Здружението на европски производители на автомобили (ACEA).
Сепак, тоа е забавување во споредба со март, кога беше забележан значително поголем скок на регистрациите на годишно ниво од 12,5 проценти.
На повеќето големи европски пазари, регистрациите се зголемија во април, поттикнати од даночните олеснувања и субвенциите, со скок од 2,7 проценти во Германија, 11,6 проценти во Италија и 8,4 проценти во Шпанија, додека Франција забележа мал пад од 0,3 проценти.
Во периодот од јануари до април, регистрацијата на нови автомобили во Европската Унија се зголеми за 4,2 проценти, и покрај тековните геополитички тензии, на 3,79 милиони.
Дополнително, во сегментот на електрични возила на батерии (BEV), регистрациите се зголемија за 33,8 проценти во споредба со истиот период минатата година, на 746.899 автомобили.
Најголем скок на регистрациите на BEV е забележан во Италија 73,1 процент, Франција 48,2 проценти и Германија 41,3 проценти, додека Белгија пријави поскромен раст од 1,1 процент.
Во првите четири месеци од 2026 година, најголем удел на нови хибридно-електрични возила (HEV) е регистриран во Европската Унија од 38,2 проценти, по што следат бензински возила со 22,5 проценти, електрични возила на батерии со 19,7 проценти, хибридни возила со приклучок со 9,6 проценти и дизел возила со 7,7 проценти, според веб-страницата на ACEA.
Пазарниот удел на BEV во Европската Унија значително порасна во споредба со првите четири месеци од 2025 година, кога изнесуваше 15,3 проценти, пренесува Танјуг.