Почна изградбата на спортско игралиште во училишниот двор на основното училиште „Вера Которка“ во кумановското село Клечовце, соопштија денеска надлежните. Теренот е подготвен, поставен е асфалт.
– Задоволни сме што нашите ученици, месното население и рекреативците ќе имаат можност да користат современо игралиште. Пред сè, ќе се подобрат условите за изведување на настава по физичко и здравствено образование, изјави директорот на училиштето, Тоде Михајловски.
Тој најави дека училиштето во оваа рурална средина очекува да почне и замена на фасадата од трите страни, обнова на прозорци, подови, проект којшто е финансиски поддржан од Министерството за образование и наука.
– Се надеваме дека и оваа обнова ќе почне и со реконструкцијата да добиеме поквалитетни услови за изведување на наставата, изјави Михајловски.
Општина Куманово претходно најави дека ќе одвои средства и за поставување на систем за парно греење.
Инаку, во основното училиште во село Клечовце настава следат 61 ученик од повеќе села од кумановско, Војник, Стрезовце, Јачинце, Бељаковце и Клечовце од прво до деветто одделение. Наставата се изведува со физичко присуство во прва смена во комбинирани паралелки.
МИА