Перу ја продолжи вонредната состојба за уште еден месец во главниот град Лима и два региони на југот на земјата, каде антивладините протести го предизвикаа најголемото насилство во земјата во последните 20 години.
Перу најпрво објави едномесечна вонредна состојба на национално ниво во средината на декември, набргу откако избувнаа протестите поради соборувањето на поранешниот левичарски претседател Педро Кастиљо, кој се обиде да го распушти Конгресот и да владее со декрет.
Повеќе од 40 луѓе ги загубија животите во судирите меѓу демонстрантите и безбедносните сили од почетокот на декември.
Проширените итни мерки потпишани од претседателката Дина Болуарте доцна во саботата, кои на полицијата и даваат посебни овластувања и ги ограничуваат слободите, вклучително и правото на собирање, се однесуваат на Лима и јужните региони Пуно и Куско. Во Пуна беше воведен десетдневен полициски час.
Анкетата на Ипсос Перу објавена во неделата покажа дека 71 отсто од Перуанците не ја одобруваат владата на Дина Болуарте, што е повеќе од 68 отсто во декември.
Демонстрантите бараат Болуарте да се повлече од власта, а Кастиљо, кој беше уапсен поради „бунт“, да биде ослободен.