Директорот на Светската здравствена организација (СЗО), Тедрос Аданом Гебреизус, во својот говор пред Меѓународниот олимписки комитет испрати предупредување за нов бран пандемии што може да резултира со бројни смртни случаи.
Светот потфрли. Тој не успеа во споделувањето, тестирањето и третманот на вакцините и сето тоа доведе до пандемија со две насоки – додека оние кои имаат се отвораат, оние кои немаат се затвораат, рече Тедрос во својот говор, осврнувајќи се на богатиот и сиромашниот дел од светот.
Тоа предизвикува не само морален бес, тој е и епидемиолошки и економски пораз. Пандемијата е тест што светот не го положи, истакна Тедрос и потсети дека повеќе од 4 милиони луѓе починале од последиците од КОВИД-19 ширум светот.
На луѓето ширум светот им е преку глава од вирусот, фактот дека им е запрен животот, страдањата што ги предизвика, ограничувањата и правилата, проблемите во економиите и општествата, темниот облак што лебдеше над нашата иднина. Сепак, 19 месеци од почетокот на пандемијата и 7 месеци од одобрувањето на првата вакцина, ние сме во почетна фаза на нов бран на инфекција и смрт. Зошто?, праша Тедрос.
Дали вакцините не требаше да го гаснат пламенот на пандемијата ?, праша Тедрос и продолжи: Но, тука е работата со овој пекол – ако само изгаснете дел од него, остатокот ќе гори. И жар од еден оган лесно може да го запали пламенот што ќе гори на друго место.
Секој што мисли дека пандемијата е над местото каде што живее, живее во лажен рај. Вакцините се моќна и фундаментална алатка, но светот не ги искористи добро, истакна Тедрос.
Тој потсети дека е можно да се контролира вирусот со вистинска комбинација на здравствени и социјални мерки, „доколку тие се применат на внимателен и систематски начин“.
Пред сè, тој мисли за тестирање, следење контакти, карантин и грижа за оние кои се во самоизолација. Но, исто така, додаде тој, она што секој треба да го стори за себе – избегнувајте гужви, почитувајте ја физичката оддалеченост, носете маска, престојувајте на отворено, проветрувајте ги просторите и мијте ги рацете.
Секоја од овие мерки може да значи разлика помеѓу животот и смртта во секоја ситуација – одење на работа, шопинг, дружење со пријателите, конференција, концерт и Олимпијада, истакна Тедрос.
Нема живот без ризик, постои само поголем или помал ризик. Јапонска поговорка вели – ехибаши за татаит ватару или тропнете на камениот мост пред да го преминете – затоа што иако нешто може да изгледа безбедно, подобро е да проверите, рече Тедрос.
Тој додаде дека иднината на светот е во рацете на светот затоа што пандемијата „ќе заврши кога светот ќе одлучи дека треба да заврши“.
Ги имаме сите потребни алатки: можеме да ја запреме оваа болест, можеме да се тестираме и можеме да ја лекуваме, истакна тој во својот говор.
Тој повика на глобална акција во која најмалку 10 проценти од населението на секоја земја ќе бидат вакцинирани до септември, најмалку 40 проценти до крајот на 2021 година, а најмалку 70 проценти до средината на 2022 година.
Ако ги постигнеме овие цели, не само што можеме да ја запреме пандемијата, туку можеме да ја рестартираме и глобалната економија, истакна на крајот Тедрос.
@DrTedros address to the International @Olympics Committee. #Tokyo2020 #AGoal4All https://t.co/v47lhan0EV
— World Health Organization (WHO) (@WHO) July 21, 2021