Десетици илјади мажи на воена возраст избегаа преку границата по одлуката на рускиот претседател Владимир Путин за мобилизација.
Од друга страна, мажите ширум земјава, со аплауз од нивните сопруги и мајки, се качуваат во автобуси кои ќе ги однесат до центрите за обука.
Илја се вратил од работа, а сопругата го чекала со документи за мобилизација. Тој брзо ги спакувал куферите и следното утро заминал во неговиот локален центар за регрутирање во Иркутск, град на Бајкалското Езеро во Сибир.
– Кога ќе ве повика татковината, мора да одговорите. Решив дека нема да ја избегнувам мобилизацијата и дека ќе ја бранам државата – рекол 27-годишниот возач на автобус, пренесува The Guardian.
Овие луѓе се доказ за јавната поддршка за војната во Украина и за растечката поларизација во земјата, рече Денис Волков од Центарот Левада, независна агенција за истражување на јавното мислење.
– Нацијата беше поделена, а мобилизацијата дополнително ги влоши постоечките поделби. Западно ориентираниот, помодерен, урбан дел од населението сака да си замине, но сепак има големо јадро на мажи кои нема да го избегнуваат тоа. Често се помалку образовани, посиромашни и позависни од државата – вели тој.
Кремљ, кој очигледно е свесен за овие поделби, сакаше да користи повеќе рурални области за својата мобилизација, а властите, наводно, сакаат да го сведат регрутирањето „на минимум“ во главните градови на регионот.
Анкетата објавена од Центарот Левада покажа дека уделот на Русите кои „целосно“ или „донекаде“ го поддржуваат она што Кремљ го нарекува „специјална воена операција“ опадна откако Путин нареди мобилизација, но сепак е 72%. Волков рече дека верува оти резултатите се веродостојни.
Тој рече дека клучниот извор на поддршка за руската војска е идејата, која секојдневно ја повторуваат на државната телевизија и ја имаат многумина во земјата, дека Русија е вклучена во поширока војна со НАТО и САД.
Интервјуата и анкетите покажуваат дека и некои Руси го прифатиле неоснованото тврдење на Кремљ дека Русија е под опсада од Западот и немала друг избор освен да ја нападне Украина.
– Мојот сопруг не се бори само против Украина, туку и против НАТО. Немаме многу сојузници – рече Људмила, чиј сопруг Сергеј беше мобилизиран оваа недела.
Од почетокот на мобилизацијата се појавија групи на Телеграм во кои жените споделуваат совети како да останат во контакт со своите партнери или синови.
Људмила, која води една од групите, рече: „Горда сум на мојот сопруг. Русија е прикована за ѕид и ние мора да возвратиме“.
И покрај континуираната поддршка на многу Руси за инвазијата на Путин, анкетата на Левада Центар покажа дека 70% од испитаниците реагирале со „страв“, „терор“ и „шок“ на наредбите за мобилизација.
Утврдено е и дека рејтингот на Путин паднал за шест поени, што е најголем пад од почетокот на војната.
Сите информации поврзани со најновите случувања со војната во Украина можете да ги прочитате ТУКА.