На традиционалниот фото конкурс на „National Geographic“ оваа година пристигнале скоро 10.000 дела од целиот свет, кои ја претставуваат нашата планета како чудно, возбудливо, преубаво, а понекогаш и опасно место. Сепак, една особено се издвоила под поимот „нереално“.
Фотографијата која била избрана за победничка фотографија за 2018 година ја направил Џејсен Тодоров, инструктор за летање и виолинист. Прикажува поглед на „гробишта“ на илјадници „ауди“ и „фолксваген“ автомобили од птичја перспектива во калифорниската пустина Мохаве. И секако постои добра причина зад оваа глетка.
Имено, автомобилите произведени помеѓу 2009 и 2015 година биле дизајнирани да мамат на тестовите за емисија на гасови. По скандалот, Фолксваген повлекол милиони автомобили.
– Се надевам дека сцената како оваа ќе помогне да станеме посвесни и повеќе да се грижиме за нашата преубава планета, рекол Џејсен.
Годишниот фото конкурс привлекол учесници од повеќе од 150 држави, а наградени се фотографии во три категории: места, дивина и луѓе, додека почесно место добила фотографијата на Синото езеро на јапонскиот остров Хокаидо.