Вооружен напаѓач во неделата рани најмалку осум лица во автобус со еврејски верници во Стариот град во Ерусалим, соопштија очевидци и израелските власти.
Напаѓачот подоцна им се предал на израелските власти, се наведува во полициското соопштение, кое не го идентификувало.
Израелските медиуми објавија дека напаѓачот бил Палестинец од источен Ерусалим.
Во Стариот град има места кои се свети за Евреите, муслиманите и христијаните, а тоа е едно од областите каде што Палестинците бараат државност.
Израел го смета целиот Ерусалим за свој главен град – статус кој не е меѓународно признат.
Нападот се случил во раните утрински часови во неделата додека Евреите си заминувале по ритуалите на Западниот ѕид што го означува крајот на саботата.
„Ерусалим е наш главен град и туристички центар за сите религии“, се вели во изјавата на премиерот Јаир Лапид, додавајќи дека израелските безбедносни сили „ќе го вратат мирот“. Ниту една вооружена група се уште не ја презела одговорноста.
Реагираа и САД
Американскиот Стејт департмент во соопштение за печатот објави дека „најостро го осудува терористичкиот напад“, додавајќи дека меѓу ранетите има најмалку пет американски државјани.
Нападот доаѓа една недела по најлошото избивање на непријателства во повеќе од една година, кога израелските авиони го гаѓаа Појасот Газа, како што рече војската, превентивен напад со цел да се спречи непосредна закана за Израел.
Најмалку 49 лица загинаа во Газа, вклучувајќи цивили и деца, а стотици беа ранети за време на 56-часовниот конфликт во кој милитантната фракција Исламски џихад истрела повеќе од 1.000 ракети врз Израел.
Оттогаш, тензиите продолжија, при што тројца вооружени мажи беа убиени во престрелка со израелските безбедносни сили во градот Наблус на Западниот Брег минатата недела.