Вториот бран на коронавирус ја погодува Индија, со најголемо дневно зголемување на нови случаи во светот, а лекарите, покрај тоа што страдаат од огромен број на пациенти и недоволен болнички капацитет, се соочуваат и со зголемување на ретки габични инфекции на мукормикоза, која ги напаѓа оние што се опоравуваат или се опоравиле од Ковид.
Тоа е многу ретка габична инфекција кои најчесто се наоѓа во почвата и гнилите растенија.
Едно лице се инфицира со вдишување на спори, а болеста се јавува кај луѓе со ослабен имунолошки систем или кај оние кои имаат дијабетес, хронично користат кортикостероиди, имаат метаболна ацидоза или имаат трансплантирани органи.
Ги напаѓа синусите, очите, мозокот и белите дробови и може да биде фатален за дијабетичарите или оние со рак и сида.
Една од оние кои се борат со оваа габична инфекција е 25-годишна Индијка со дијабетес, која се опоравила од коронавирусот пред три недели.
Таа вчера за првпат била оперирана од специјалист за уво, грло и нос, по што била оперирана три часа на окото.
„Ќе и го отстранам окото за да и го спасам животот. Така функционира оваа болест “, изјави д-р Акшеј Наир за Би-Би-Си.
Тој верува дека во случај на младата Индијка, мукормикозата, од која стапката на смртност е 50 проценти, е предизвикана од стероиди што ги земала како дел од терапијата со болеста Ковид-19, што обично им се препишува на пациенти со сериозен или тежок коронавирус.
Стероидите го намалуваат воспалението во белите дробови кога станува збор за Ковид-19 и докажано е дека помагаат да се спречи оштетувањето што може да се појави во организмот кога имунитетот се „прегрее“ во борбата против коронавирусот.
Но, тие исто така можат да предизвикаат пад на имунитетот и да го зголемат нивото на шеќер во крвта и кај дијабетичарите и кај недијабетичарите кои имаат Ковид.
Намален имунитет предизвикувач на мукормикоза
Се верува дека ова опаѓање на имунитетот е предизвикувач за случаи на мукормикоза.
„Дијабетесот ја намалува имунолошката одбрана на организмот, коронавирусот го влошува и стероидите кои помагаат во борбата против Ковид-19 додаваат гориво на огнот“, вели д-р Наир, кој работи во три болници во Мумбаи, еден од најпогодените градови во Индија од епидемија на коронавирус.
Тој изјави дека само во април имал 40 пациенти кои добиле мукормикоза. Многу од нив биле дијабетичари кои се опоравувале од Ковид дома. На 11 од нив морала да им биде извршена операција за отстранување на окото.
Од декември до февруари, само шест негови колеги во пет градови пријавиле 58 случаи на инфекцијата. Повеќето пациенти се инфицирале 12-15 дена по закрепнувањето од коронавирусот.
Една од болниците во Мумбаи бележи 24 случаи на мукормикоза во последните два месеци, што е значително зголемување во споредба со претходниот просек од шест случаи годишно. Од тие случаи, 11 загубиле око, а шест починале. Повеќето заболени се дијабетичари од средна возраст, кои се заразиле две недели по закрепнувањето од Ковид.
„Веќе се соочуваме со два до три случаи неделно. Тоа е вистински кошмар среде пандемија“, рече д-р Ренука Брадо од болницата во Мумбаи.
Симптоми на мукормикоза
Пациентите кои добиваат мукормикоза најчесто имаат затнат нос или крварење од носот, оток и болка во окото, овенати очни капаци, заматен вид и, на крајот, губење на видот. Исто така, може да се појават црни дамки на кожата околу носот.
Лекарите наведуваат дека повеќето пациенти со оваа инфекција се јавуваат предоцна, во време кога веќе го губат видот и обично е потребно да се отстрани окото за инфекцијата да не се прошири на мозокот.
Во некои случаи во Индија, лекарите наведуваат дека пациентите останале без обете очи, а во ретки случаи на заболените морало да им се извади вилицата за да се спречи ширењето на болеста.
Единствениот лек што помага во овој случај е инјекција која чини 48 долари, а мора да се зема секој ден во период од осум недели. Единствениот начин да се спречи оваа габична инфекција е да се осигура дека пациентите со Ковид добиваат стероиди во вистинска доза и за вистинско време, и за време на третманот и закрепнувањето, вели еден лекар од Мумбаи.