Населението во Србија ќе се намали за 15 проценти или еден милион граѓани во текот на следните три децении, рече денес Саша Ранѓеловиќ, професор на Економскиот факултет во Белград.
На презентацијата на билтенот Квартален монитор за влијанието на демографскиот пад врз економскиот раст во Србија и регионот, тој рече дека намалувањето на две третини од населението ќе се должи на негативниот природен раст и една третина на емиграцијата.
„Се проценува дека до 2050 година населението во Србија ќе се намали за 5 проценти како резултат на емиграцијата, така што само Албанија и Летонија ќе имаат поголемо намалување на популацијата заради емиграцијата“, рече Ранѓеловиќ.
Тој додаде дека „остар пад на населението, исто така, ќе влијае на намалувањето на контингентот на работната сила во Србија за околу една петтина, што, иако е за нијанса помалку од просекот на земјите од Централна и Југоисточна Европа, е многу значајно“.
Поради падот на населението и неговото стареење, како и падот на продуктивноста, рече тој, просечната стапка на раст на БДП по глава на жител во Србија во текот на следните три децении ќе биде пониска за околу 0,8 процентни поени.
„Ова значи дека БДП по глава на жител ќе се намали за скоро една четвртина до 2050 година“, рече Ранѓеловиќ.